أنا مرهنة عليك

فمستمر في تجاهله ليها ومركز علي شغله وإن شركته تبقي التوب ونور مش في دماغه خالص
فرجع البيت وكانت مامته وصاحبتها مامت نور قاعدين مع بعض فدخل عليهم وسلم وبيسال عن نور
ازيك يا طنط عامله ايه امال فين نور مش شايفها بقى لي تقريبا شهر هي كويسه
ردت عليه بابتسامه وهي بتحكي له
هي فعلا الشهر ده كانت مشغوله جدا بتعمل تغيير جذري في شكلها وفي كل حاجه علشان خاطر اخيرا هتوافق على عرض من العروض اللي بتتقدم لها من جميع القنوات مش عايزه اقول لك بقيت حاجه ثانيه خالص قلعت النظاره وعملت ليزك وبقيت تلبس دلوقتي احسن صيحات الموضة.

حس بغليان من جواه من ساعه ما سمع الكلام ده ومش عارف ايه السبب اللي خليه يحس انه مولع من جواه بالشكل ده وسالها بغموض
يعني ايه الكلام ده يا طنط نور قلعت الحجاب وبتلبس خليع دلوقتي
شاورت بايديها برفض وجاوبته 
لا يا حبيبي ده ما رضيتش تقلعه خالص وهي ما شاء الله عليها غيرت اه من شكلها ومن نفسها لكن زي ما هي محافظه على احتشامها واحترامها .
ارتاح شويه لكن كمل كلامه وسالها
ولما هي ما قلعتش الحجاب ولسه باحتشامها زي ما حضرتك ما بتقولي هتطلع تقدم البرنامج ازاي وهم كان من شروطهم ان هي تقلع الحجاب علشان كده كانت رافضه تماما
جاوبته بابتسامة
لا يا حبيبي ما انت ما تعرفش ان هي كان بيجي لها في الفتره الاخيره عروض انها تقدم عادي بالحجاب وبحريتها لكن هي كانت بترفض من بره بره وانا ما اعرفش لحد ما لقيتها جايه لي وبتقول لي ان هي خلاص قررت انها تمارس المهنه ومش هتضيع الماجستير اللي خدته على الفاضي وهي قاعده في البيت وقالت لي ان هي هتوافق على عرض برنامج السابعه مساء على قناه الام بي سي وجهزت نفسها وخطتها للبرنامج من بقى لها شهر شغاله عليه علشان كده ما بتخرجش كتييير .
سمع منها الكلام واستاذن منهم وخرج ركب عربيته وهو مش عارف رايح فين وبعد شويه لقى نفسه قدام الفيلا بتاعتهم ودخل قعد في الجنينه وطلب من البواب انه ينده لنور واول ما نور عرفت ان هو اللي قاعد بره دقات قلبها بقت تتصارع ومش مصدقه نفسها فكلمت صاحبتها على طول وعرفتها ان ادم جالها البيت لاول مره بيسال عليها ومش عارفه تتعامل معاها ازاي فردت عليها صاحبتها
شوفي بقى احنا بقى لنا شهر بدربك على الثبات النفسي وعلى الهدوء وعلى الثقه بنفسك فعايزاكي تخرجي تقعدي قدامه وانت معتزه بنفسك وبقيمتك وبمقامك ده انت بقيتي دلوقتي الباش مذيعه 
عايزاكي تقعدي وتعملي نفسك ان انت مش فاضيه وكمان ما تحسسيهوش ان انت مهتمه بيه واهم حاجه نظرات عينيك وانت قاعده قدامه ما تضعفيش
علشان خاطر يحس إنه هو مش مالكك ومالك دماغك زي الاول 
البسي دلوقتي طقم شيك واتاخري عليه شويه علشان ما يحسش بلهفتك ويحس انه دلوقتي ما بقاش من اولوياتك ولا انك تضيعي وقت معاه .
وعدت صاحبتها انها هتحاول تنفذ كلامها على قد ما تقدر وبعد شويه تقريبا ربع ساعه كده نزلت له وما سلمتش بالايد كالعاده وقالت له بلا مبالاة
ازيك يا ادم اخبارك ايه
اما ادم عمال يبص على اللي قاعده قدامه واللي شكلها اتغير 180 درجه بقى مصډوم من كتله الجمال والشياكه والتغيير اللي قدامه في ملامحها وفي لبسها ونظرات الانبهار اتحولت لنظرات غير مفهومة وبقي ېحترق من جواه وقال لها باستنكار
هي فين نور أنا مش عايزك إنتي اندهيها... يتبع
الروايه كامله في التعليقات